ელემენტ ქონსთრაქშენი უზბეკეთის ბაზარზე გავიდა

„ელემენტ ქონსთრაქშენმა“ უზბეკეთში დაიწყო ოპერირება - აღნიშნული ფაქტი კომპანიის დირექტორმა ალექსანდრე ოქროშიძემ გადაცემაში „საქმიანი დილა“ სტუმრობისას გააჟღერა.

მისი ინფორმაციით, კომპანიას უკვე აქვს მიმდინარე პროექტი სამოქალაქო მშენებლობის ჭრილში, რაც მრავალბინიანი საცხოვრებელი კომპლექსის მშენებლობას მოიცავს. „ელემენტ ქონსთრაქშენი“ უზბეკეთში ადგილობრივ კომპანიასთან „ბელტერა ჰოლდინგთან“ ერთად ოპერირებს.  

ბიზნეს გადაცემაში სტუმრობისას ალექსანდრე ოქროშიძემ 2024 წლის შედეგებიც შეაჯამა და აღნიშნა, რომ კომპანია არაერთი მნიშვნელოვანი მიმართულებით განვითარდა. „გასულ წელს „ელემენტ ქონსთრაქშენმა“ დამკვეთებს პირველად შესთავაზა მშენებლობის ზედამხედველობისა და მართვის მომსახურება. ამ მხრივ, მიმდინარე პროექტი კავკასიის უნივერსიტეტის ბათუმში მდებარე კამპუსი გახლავთ. აღვნიშნავ, რომ თავად სერვისი მოითხოვს გამორჩეულ პროფესიონალიზმს, საერთაშორისო სტანდარტებთან და სპეციფიკაციებთან თანხვედრას და რაც მთავარია, გამოცდილებასა და ექსპერტიზას“, - განმარტა ალექსანდრე ოქროშიძემ.

კომპანიის დირექტორმა ბრენდის 2025 წლის ხედვებზეც ისაუბრა და აღნიშნა, რომ „ელემენტ ქონსთრაქშენის“ სტრატეგიულ მიზნად განვითარება და ინოვაციური სერვისების დანერგვა რჩება.

‍